Kudeaketa partekatua eta auzo-konpromisoa oinarri, eremu malgu bilakatzeko bidean da Landaluze 27

Landaluze 27ren etorkizuna definitzeko prozesu parte-hartzaileak beste urrats bat eman zuen joan den maiatzaren 27an, bi gai giltzarri ardatz dituen saio batekin: orain arte jasotako ideiak lokalaren antolakuntza fisikoan lurreratzea eta etorkizuneko kudeaketaren eta gobernantzaren oinarriak definitzen hastea.

Saioaren lehen zatia espazio fisikoari eskaini zitzaion. Taldeka lan egin aurretik, azaldu zen lokala egokitzeko irizpide nagusia proiektuaren bideragarritasuna izango dela. Udalaren helburua gutxieneko esku-hartze bideragarri baterantz aurrera egitea da, espazioa egokitu eta lehenbailehen erabileran jarri ahal izateko, irekiera atzeratu lezaketen hasierako obra handiak saihestuz.

Ildo horretan, jakinarazi zen ez dela aurreikusten lokalaren barruan bereizketarik egitea, baizik eta ekipamendu ireki, malgu eta balioaniztuna mantentzea. Aurreikusitako edo kontuan hartutako jarduketen artean daude komunak egokitzea; office-gune bat jartzea, sukalde-gainekoa, harraska, hozkailua eta mikrouhin-labea izango dituena; lokal osoa intsonorizatzea; zorua egokitzea; bitarteko elektronikoen bidezko sarbide-sistema bat instalatzea; kalera begirako beirate bat irekitzeko aukera; eta oinarrizko altzariak jartzea, hala nola armairuak, aulkiak, mahaiak edo pantaila.

Informazio horretatik abiatuta, parte-hartzaileek taldeka lan egin zuten lokalaren plano baten gainean. Talde bakoitzak ekipamenduaren banaketa posible bat irudikatu zuen, espazioaren eguneroko funtzionamendurako beharrezkoak diren jarduerak, erabilera-guneak, altzariak eta elementuak kokatuz. Proposamenek ñabardura desberdinak izan zituzten, baina bietan irizpide komun batzuk agertu ziren: gehiegizko zatikatzea saihestea, bereizketa arin eta mugikorrak izatea, giltzaz ixteko moduko biltegiratze segurua edukitzea, komunitate-jardueretarako gune zabal bat gordetzea, office-gune bat laguntza-puntu gisa txertatzea eta, teknikoki posible bada, argi naturalaren sarrera eta kanpoaldearekiko ikus-harremana hobetzea, beirateen edo leiho handien bidez.

Saioaren bigarren zatian gobernantza-eredua landu zen. Abiapuntua argia izan zen: Landaluze 27 kudeaketa mistoko ekipamendu publikoa izango da. Horrek esan nahi du Udalak bere gain izango dituela eskuordetu ezin diren erantzukizunak, hala nola aseguruak, mantentze-lanak, baimenak, araudia betetzea eta ekipamendu publikoaren berme orokorrak; eta auzotarrek eginkizun aktiboa hartu ahal izango dutela jardueren proposamenean, programazioan, espazioaren zaintzan, dinamizazioan eta jarraipenean.

Dinamikan zehar, Udalak eta auzotarrek modu partekatuan bere gain hartu beharko dituzten zereginak ere landu ziren. Horien artean daude programazioa, egutegia eta erreserba-sistema, espazioaren zaintza, bizikidetza-arauak eta hobekuntzen jarraipena. Erabilera autonomoak arauekin, trazabilitatearekin eta erantzukizunarekin batera joan beharko du: jakitea nork erabiltzen duen espazioa, noiz erabiltzen duen, zer jardueratarako eta ondoren zer baldintzatan geratzen den.

Azken dinamikak auzotarren inplikazioa landu zuen, prozesuaren hurrengo etapari begira. Horretarako, lurrean lerro bat erabili zen, konpromiso-maila desberdinak irudikatzeko: jada Udalarekin elkarlanean hasi eta espazioa ireki aurreko aldian jarduerak aktibatu nahi dituzten pertsonetatik hasi, eta aurrerago parte hartu nahi dutenetara edo, besterik gabe, espazioa irekita dagoenean erabiltzaile izan nahi dutenetara arte.

Erantzunak inplikatzen jarraitzeko prestutasun nabarmena erakutsi zuen. Pertsona talde batek hemendik aurrera elkarlanean aritzeko eta irekieraren aurreko aldian jarduerak aztertzeko interesa adierazi zuen. Beste talde batek ekitaldietan edo zeregin zehatzetan unean-unean laguntzeko prestasuna adierazi zuen. Pertsona kopuru txikiago bat etorkizunean inplikatzeko aukeran edo, espazioa ireki ondoren, erabiltzaile gisa parte hartzeko aukeran kokatu zen.

Emaitza hori bereziki garrantzitsua da, aukera ematen duelako “trantsizio-une” deiturikoari —prozesu parte-hartzailearen itxieraren, proiektuaren idazketaren, obraren eta ekipamenduaren benetako irekieraren arteko aldiari— ez soilik itxarote-denbora gisa heltzeko, baizik eta komunitatea bizirik mantentzeko, irekiera prestatzeko eta auzotarren eta Udalaren arteko lankidetza-ohiturak eraikitzen hasteko aukera gisa ulertzeko.

Prozesuak aurrera jarraitzen du. Hurrengo saioa ekainaren 3an izango da, 18:00etan, ekipamenduan bertan. Saio horretan auzoa dinamizatzeko jarduerak, espazioa ireki aurreko ekintzak eta Landaluze 27ren identitateari buruzko lehen elkarrizketa landuko dira.

Halaber, gogorarazi da prozesuaren WhatsApp zabalkunde-kanalak aktibo jarraitzen duela, eta bertan partekatuko dela hurrengo urratsei eta deialdiei buruzko informazioa: https://labur.eus/Landaluze27WA.